Тұрысов Ә.

Жаңартылды 06.04.2022 12:29

Тұрысов Әмірғазы (1919-ө.ж.б.) – қызыләскер, 108-ші армия батальонының бронебойщик жауынгері, Ұлы Отан соғысына қатысқан, Кеңес Одағының Батыры атағына ұсынылған.

1919 жылы Шығыс Қазақстан облысы Көкпекті ауданында дүниеге келген.

1942 жылы Семей облысы (қазір Шығыс Қазақстан облысы) Көкпекті әскери комитетінің шақыруымен Қызыл Армия қатарына өтті.

Қызыләскер, 1-Украина майданы 60 Армия 108-армия батальонының бронебойщигі болып әскери қызмет етті.

Қазақ халқының батыр ұлы Тұрысов Әмірғазы 1943 жылы 21 қарашада Радомышлью ауданы, Ленино селосы үшін күресте батылдық пен ерліктің үлгісін көрсетті.

Неміс басқыншыларының шабуылы кезінде Ә.Тұрысов жау танкісі мен танк десанттарына қарсы шығып, 250-300 метр жерге таяп келген жау танкісін жойды. Осы ұрыста Тұрысов 20 шақты жау десантын жер қаптырды. Ол позицияны жау техникасына бағыттап, бір миномет пен тағы 7 гитлершіні жойды.

Майдан Қолбасшысының тапсырмасын бұлжытпай орындап, ерлік пен батылдық көрсеткені үшін Ә.Тұрысов Кеңес Одағының Батыры атағына ұсынылды.

25 қараша 1943 жыл. 108 ОАБ ПТР командирі майор Лысов (1943 жыл 25 қарашадағы наградаға ұсыну парағынан).

Неміс басқыншыларымен күресте майдан Қолбасшысының тапсырмасын бұлжытпай орындап, ерлік пен батылдық тың үлгісін көрсеткені үшін КСРО Жоғарғы Кеңесі Президиумының 1944 жыл 20 қаңтардағы № 012/н жарлығымен қызыләскер, 108 - армия батальонының бронебойщик жауынгері Әмірғазы Тұрысов Қызыл Ту орденімен марапатталды.

Қайтыс болған жылы мен күні белгісіз.

Деректер

Источники

Трусов Амаргазы [Электронный ресурс] // Подвиг народа 1941-1945 : сайт. – Режим доступа : http://podvignaroda.ru/?#id=21828046&tab=navDetailManAward (03.04..2018)