Жақпаев У.У

Жаңартылды 14.04.2022 15:59

 Жақпаев Уәзірқан Уәлиұлы (1946-1987) - аға прапорщик, әскери бөлімнің қаржы қызметі бастығының көмекшісі.

1946 ж. 3 желтоқсанда Алтай өлкесі, Усть-Кокси ауданы, Верхний Уймон селосында дүниеге келген. 1967 ж. Лениногорск (қазіргі Риддер қаласы) қаласындағы орман шаруашылығы техникумын аяқтайды, кейін КСРО Қарулы Күштері қатарына жедел әскери қызметке шақырылады. Әскери борышын өтеген соң, Шығыс Қазақстан облысы, Катон-Қарағай ауданындағы орман шаруашылығында инженер-техник болып қызмет атқарады.

1970 ж. Тәжік КСР, Душанбе қаласындағы прапорщиктер мектебіне оқуға түседі. Оны аяқтаған соң Шығыс Қазақстан облысы, Жаңа-Ахмер селосындағы әскери бөлімде, кейін Германияда қызмет атқарады. 1977 ж. А. В. Хрулев атындағы Ярославль жоғары әскери қаржы училищесін аяқтайды. Германия, Қырғызстанда әскери қызметін жалғастырып, қайтадан Жаңа-Ахмер кентіне оралады. Дивизияның қаржы бөлімі бастығы қызметін атқарады.
1987 ж. 11 сәуірде Ауғанстанға әскери борышын өтеуге жіберіледі. 1987 ж.
7 мамырда жауынгерлік тапсырманы орындау барысында қаза тапты. 1987 ж. 13 мамырда Шығыс Қазақстан облысы, Катон-Қарағай ауылында жерленді.
КСРО Жоғарғы Кеңесі Президиумының Жарлығымен Қызыл Жұлдыз орденімен марапатталды (қаза тапқаннан кейін).

Әдебиеттер:
Азалы кітап : ауған жеріндегі әскери қимылдар барысында қаза тапқан шығысқазақстандық жауынгерлер (1979-1989 жж.) = Книга памяти : воины - восточнокахстанцы, погибшие во время боевых действий в Афганистане (1979-1989 гг.) / "Ауғанстандағы соғыс ардагерлерінің Өскемен ұйымы" қоғамдық бірлестігі ; "Ауған соғысы және Семей қаласындағы жергілікті соғыстардың соғыс ардагерлері мен соғыс мүгедектері" қоғамдық бірлестігі ; А. С. Пушкин атындағы Шығыс Қазақстан облыстық кітапханасы ; Абай атындағы Шығыс Қазақстан облыстық кітапханасы. - Өскемен : [б. и.], 2014. - Б. 82-83.