Рамазанов С.

Жаңартылды 22.02.2022 16:33

Рамазанов Самат (1963-2020) - спортшы. Самбо мен дзюдодан халықаралық дәрежедегі спорт шебері, қазақша күрестен ҚР спорт шебері, түйе балуан

1963 жылы Шығыс Қазақстан облысы Күршім ( бұрынғы Марқакөл) ауданында туған.

Алматы қаласындағы №6 спорт мектебінде оқып, грек-рим күресімен айналысты. Бала кезінен Саматтың бойынан қазақ батырларына тән жігерлілік байқалатын. Сүйегі ірі болса да, соншалықты өте қарапайым болып өсті. Самат 1992 жылы әлем кубогының жеңімпазы, Владивостокта самбодан өткен Азия чемпионатының жеңімпазы болды. Самат кеден саласында қызмет етті. Кеденде жүріп те спортты тастамады. Тіпті, Жапонияға барып, сумо күресінен де бағын сынады. Екінші орын алды. Содан кейін 1995 жылы ЮНЭСКО аясында өткен Ұлы Абайдың 150 жылдық мерейтойында түйе палуандар бәсекесінің жеңімпазы атанды. Самат әкеден ерте айрылғандықтан спорт жолында талай қаржылық қиыншылықтарды бастан өткерді. Сондықтан болар, ол спорт саласындағы қазақтың талай талантты жастарына қаржылай көп көмек көрсетті. Талай спортшылардың бағы ашылып, әлемдік додаларда көш бастады. Саматты қазақтың нар тұлғалы батырларының бірі болды. Қазақ жастарының рухын көтеріп, қазаққа кеудесін көтерген талайлардың мысын басқан азаматтардың бірі және бірегейі Самат Рамазанов еді.

Самат Рамазанов самбодан Қазақстанның, Азияның бірнеше дүркін чемпионы, КСРО Құрама командасының мүшесі, Әлем чемпионатының қола жүлдегері,сумодан Азия чемпионатының бірнеше мәрте жүлдегері. Қазақша күрестен бірнеше мәрте Түйе балуан атағын иеленген. Абайдың 150 жылдығына арналған халықаралық турнирдің жеңімпазы.

Самат отбасы, бала тәрбиесіне ерекше көңіл бөліп, ұлдары Айдын мен Дастан жапон күресінде табысты өнер көрсетуде.

Белгілі меценат, қазақ спортының дамуына үлкен үлес қосқан спортшы Самат Әділханұлы Рамазанов 2020 жылы 28 маусымда дүниеден өтті.

Самат Рамазанов туралы мерзімді баспасөз бетінде жарияланған мақалалар

Публикации о C. Рамазанове в периодических изданиях

Елубай О. Сумо спортының саңлағы атанған Самат [Мәтін] / О. Елубай // Дидар. - 2021. - 17 маусым.- Б.19.

Телебаев, Мұрат. Марқадан шыққан атақты балуан [Мәтін] : [Марқа өңірінің тумасы, самбодан әлем кубогінің жеңімпазы, атақты балуан С. Рамазанов туралы] / М. Телебаев // Рауан - Заря. - 2021. - 18 маусым.- Б.1,3.

Ғафуров, Аслан. Туған жердің тау тұлғалы текті ұлы [Мәтін] : Қазақтың бас балуаны, марқұм С. Рамазановтың рухына / А. Ғафуров // Рауан - Заря. - 2021. - 18 маусым.- Б.3.